我的父親母親

我眼中的爸爸可以用「古代人」黎形容

- 日出而作、日入而息
爸爸既生活時間表應該o係我出世到呢一刻都無改變過。每日天未光就去飲早茶，返工前會去做轉運動先。夏天去泳池游水，冬天就去跑步。每晚7點左右就收工返到屋企。7時半左右就一定要開飯，晚飯過後食生果。9時半就上床訓覺。就算係假期，都會勁早起身同埋勁早訓。原本佢一個人早起身不是問題，但爸爸佢好鐘意嘈醒人。佢真係試過星期日晨早o係到鑽牆架!!!無論咩人或事阻到佢既schedule，佢就會發脾氣。好似去飲咁，實夜架啦，佢都會照口黑面黑，咩親戚都無面俾。

- 抗拒新事物
無論係錄影機、LD、VCD或DVD，我老豆一概不接受。除左知道電腦叫做電腦之外，完完全全係零認識。e家新興既手電加數碼相機對佢黎講，就好似來自外太空咁。

- 謝絕消費
我諗老豆最大既消費項目就係打麻雀。佢唔鐘意睇戲、唔鐘意去旅行、更加唔鐘意行街買野。

初中時期既我唔多鐘意爸爸，成日都頂撞佢。好記得表姐鬧過我，「無佢搵錢養你，你仲o係到???」o個時都唔明白架。不過經過A-Level住hostal o個兩年，無一齊住，我地既關係反而改善左。曾經掛住屋企掛到喊。人大左，就開始去了解爸爸。無錯佢有佢既臭脾氣，但係一家人，佢都受過我地架啦~佢係唔識新科技，但全家有咩壞左都係靠老豆攪返掂。我老豆都有佢可愛之處。

相對於爸爸，我地三姐弟都愛媽媽多一點。

聽阿姨講，媽媽為左照顧我地犧牲左好多野。例如佢無出去做野，留在家照顧我地。媽媽本來唔識煮野食，都係為左我地一家人，慢慢咁學返黎(我最鐘意媽媽既水餃同埋西洋菜老火湯!!!)唔好睇我媽媽成日唔緊唔緊咁，佢個心好鍚我地架。讀大學時，我堅持做partime，唔問屋企攞錢。佢知我為左儲錢，o係hostal成日食杯麵，佢就成日買定d野食擺o係屋企，俾我帶返去食。做足家庭主婦咁多年，媽媽e家終於可以放鬆點，搵返d人生樂趣喇。

希望爸爸媽媽身體健康，好好享受下生活~~~
(我都要搵多d錢，花多d時間同心機，好好孝順佢地~~~)