遇到「高學歷低能兒」你會點做?

話說我今日下午去戲院睇戲。開畫前仲有時間，我就去商場無聊地逛逛。 路過MUJI男仕服飾部，我聽到一把無咩自信既男仔聲問個售貨員：「我想問有咩薄既外套顏色襯我膚色架?」我順住佢既手指指向佢本人塊面，一塊青春無敵既面就係我面前。由於睡眠不足既我內心早早發出「黃色火災危險警告」，我等唔切售貨員既回應就速速離開現場。 我內心善良既一面：「阿哥仔係色盲既，所以要搵人幫手俾意見。」另一方面諗：「唔係呀，咁大個人，買件外套都做唔到決定???其實彩色斑馬紋好o岩你膚色，可惜MUJI無呢D style，我建議你去MK或SSP走一轉。」 好不容易磨到夠鐘入戲院。坐低一陣，一堆堆既後生仔女都入場。我估學生佔大多數，我係負責拉高場內既平均年齡。其中7個坐左我身邊前後行，佢地言語間暗示(其實都幾明下)我坐左佢地其中一個位。由於人地人多勢眾，我內心脅左一脅，偷偷望左張飛尾，我無入錯院又無坐錯位，於是我主動俾張飛尾佢地睇，佢地當然縮啦。 戲院內燈光轉暗而且開始播廣告,個7條友繼續擾攘。我內心既「火災危險警告」已經由黃色轉左紅色。突然間，佢地其中一條友發現，原來佢地買左聽日飛!!!(WTF!!!)我隔離位個女仔第一時間講「妖,賣飛o個個係咪智障架?」(吓?你地唔CHECK下張飛,將所有責任推哂俾人架?)已經開始放TRAILER,佢地堆中終於有兩個人肯攞住D錯飛出去搵人協助。其餘既人繼續o係個位到「點算呀?...點算呀?...」好彩最後有個經理入黎幫佢地解決，可惜我咩睇戲MOOD都破壞哂。